MONUMENTA MOGUNTINA EDIDIT PHILIPPUS JAFFÉ NEW YORK BEROLINI APUD WEIDMANNOS MDCCCLXVI PROOEMIUM. Statuentem me Bonifatii Lullique epistolas una cum reliquis fere omnibus monumentis ad ecclesiasticum Germaniae caput spectantibus huic tertio volumini mandare quamvis minime fugerit, rerum gravitati maxime ob subsidiorum adhibendorum et multitudinem et dissipationem responsuras esse laboris difficultates, tamen florentissima hoc tempore universarum paene bibliothecarum liberalitate confisus sum. Neque spem meam, qui publicis librorum copiis praesunt, excepta una asperitate obscura, fefellerunt. Non enim modo in duobus annorum 1863 et 1865 itineribus ad divitias bibliothecarum Bruxellensis, S. Crucis prope Vindobonam, Francofurtensis, S. Galli, Monacensis, Pommersfeldensis aditum facillimum habui, verum etiam, qui libri manu scripti longiorem requirebant tractationem, eos in museo meo Berolinensi expeditissime legere licuit. Nam benigno summorum regni nostri administrorum interventu pretiosi libri bibliothecarum Caesareae Vindobonensis et Carlsruhensis apportati sunt, et praeterea quoque viri humanissimi mittendis |