SEV

MONVMENTA ECCLESIASTICAE ANTIQVITATIS
EX MSS. CODICIBVS NVNC PRIMVM EDITA

AVT DENVO ILLVSTRATA

OPERA ET STVDIO

D. GERMANI MORIN

Presbyteri & monachi Ord. S. Benedicti Maredsolensis.

VOL. III PARS I

SANCTI HIERONYMI PRESBYTERI

COMMENTARIOLI IN PSALMOS.

TIBKYBA

MAREDSOLI
apud Editorem.

OXONIAE apud J. PARKER & Soc. Bibliopolas.

1895.

9.12

PRAEFATIO.

Genuinis sancti Hieronymi operibus in editionibus etiam praestantissimis proxime subiungitur haud parvae molis liber, qui multis saeculis in auctoritate fuit, Breviarium in psalmos' ab antiquariis inscriptus. Quem quidem immerito tanti nominis viro in totum fuisse addictum, ex quo ars critica in rebus humanis magis profecit, nemo adhuc non vidit, nemo iam sui compos infitias ibit.

Quamquam vero operi in universum considerato falsitatis notam imponere compellimur, profecto perspicuum est multa in eo reperiri, quae magni jure aestimentur, immo quae a nemine alio quam ab ipso Hieronymo scripta esse videantur. Rem eloquentissime more suo nec minus dilucide exposuit I. B. Bossuet, Meldensis ille quondam episcopus, ubi, cum de Psalmis universim dissereret, quasi excusatione usus, cur etiam ex Breviario in Psalmos nonnulla prolaturus esset: Neque nos, inquit, fugit hos commentarios a Sixto Senensi et aliis sancto viro abiudicatos. Nos eius esse dicimus, qui quadringentesimo fere Christi anno scriberet: qui nullam memoraret haeresim, quae non quarto saeculo exstitisset: qui monachi propo

A

sito viveret: qui Hierosolymitanum solum rusque Bethlemicum praesepi Dominico delectatus incoleret: qui ea, quae ex hebraica eruditione promeret, Hieronymo proferret ubique gemina. Sin autem saepe allegorica, et alia quae ab Hieronymi consuetudine ac sensu abhorrere viderentur : nihil mirum cum in ipsa praefatione testetur, a se quidem tradi magis Origeniana quam sua: quod et ipsum Hieronymus saepe fecerit, ne quidem admonito lectore. Quin etiam in psalmum XCIII longam interpretationem referemus, quam ipse Augustinus ex Hieronymi commentariis in Psalmos sumptam esse testetur, tam reliquis similem, ut nihil supra. Refert et Gregorius ex eo commentario quaedam sub Hieronymi nomine. Quin ipse Hieronymus eas interpretationes a se in Psalmos editas memorat, quae in hoc libro reperiantur. His victi fatentur, hos commentarios ex Hieronymo potissimum esse consarcinatos; quod nobis sufficit.

Haec ille quem ne forte inflammatione quadam animi, quod quidem haud raro iis accidit qui elegantiore dicendi modo delectantur, deceptum esse existimes, en tibi alium testem produco, in quem nulla cadat huiuscemodi suspicio : Dominicum Vallarsium dico, diligentissimum Hieronymiani ingenii indagatorem, qui tametsi Breviarium perperam sancto Patri ascriptum esse' aperte pronuntiet, illud tamen fatetur e suppositiorum numero fetuum ceteris praestan