Page images
PDF
EPUB
[merged small][merged small][ocr errors][ocr errors][ocr errors][merged small][ocr errors][merged small][merged small][merged small][merged small]

Confirma hoc, Deus, quod operatus es in nobis, a templo sancto tuo quod est in Jerusalem.

Psalmus. Narrabo nomen tuum fratribus meis: in medio ecclesiæ laudabo te.

Qui timetis Dominum, laudate eum: universum semen Jacob glorificate eum.

Timeat eum omne semen Israel: quoniam non sprevit neque despexit deprecationem pauperis.

Nec avertit faciem suam a me : et cum clamarem ad eum exaudivit me.

Gloria Patri.

Repetatur antiphona.
Oremus.

Deus, qui ecclesiam tuam de omnibus mundi finibus congregatam, per tui lateris admirabile sacramentum cunctarum gentium matrem esse dixisti, quam etiam populorum varietate depictam martyrum tuorum meritis decorasti: benedic, Domine quæsumus, sanctorum tuorum opitulante suffragio, tam altare quod eorum exornatur, te juvante, reliquiis, quam ecclesiam, atque fidelium tuorum vota offerentium sanctifica : qui vivis.

Sequitur benedictio elevata manu, per longum et latum loci, dicens:

Benedictio Dei Patris omnipotentis, ingeniti Filiique ipsius unigeniti, necnon Sancti Spiritus Paracliti ab utroque procedentis, maneat jugiter super ecclesiam istam, vel, cœmeterium istud, in sæcula sæculorum. Amen.

Postea dicat episcopus missam de reconciliatione. Si cœmeterium sit, dicatur missa:

Requiem æternam.

Si ecclesia sit, dicatur hæc missa.
Officium.

Dum sanctificatus fuero in vobis, congregabo vos de universis terris, et effundam super vos aquam mundam, et mundabimini ab omnibus inquinamentis vestris, et dabo vobis spiritum novum.

In tempore paschali: Alleluia.

Psalmus.

Benedicam Dominum in omni tempore: semper laus ejus in ore meo.

Oratio.

Deus, qui dixisti, domus mea domus orationis vocabitur, domum istam alienis offensionibus contaminatam mundare et sanctificare digneris, ut omnium preces et vota in hoc loco ad te clamantium clementer exaudias, et benigne perficias: per Dominum. Epistola.

Ecce ego Johannes.

Resp. in dedicatione ecclesiæ.

Graduale. Tollite hostias et introite in atria ejus: adorate Dominum in aula sancta ejus.

Versus. Revelavit Dominus condensa, et in templo ejus omnes dicent gloriam. Alleluia.

Versus. Adorabo ad templum sanctum tuum, et confitebor nomini tuo.

Si infra Septuagesimam evenerit, dicatur tractus. Laudate Dominum omnes gentes, et collaudate eum omnes populi.

Versus.

Quoniam confirmata est super nos misericordia ejus, et veritas Domini manet in æternum.

Secundum Lucam:

In illo tempore; dixit Jesus discipulis suis, non est arbor bona quæ facit fructus malos.

Offertorium.

Oravi Deum meum ego Daniel dicens, exaudi, Do

mine, preces servi tui, illumina faciem tuam super sanctuarium tuum, et propitius intende populum istum super quem invocatum est nomen tuum, Deus.

In tempore paschali: Alleluia.

Secretum.

Hæc hostia, quæsumus Domine, et locum istum ab immunditiis iniquorum vel patrata offensionis expurget, et supplicationes nostras hic et ubique tibi reddat acceptas. Per Dominum.

Benedictio episcopalis.

Omnipotens Deus universa a nobis et ab hoc templo vel cœmeterio adversa excludat; ac suæ super vos benedictionis dona propitiatus infundat. Amen.

Corda convenientium ad hanc reconciliationem efficiat sacris intenta doctrinis, quo possint repleri beneficiis sempiternis. Amen.

Quatenus exequenda intelligentes, et intellecta exequentes, inter adversa mundi ab omni sorde peccatorum purificati inveniamini incolumes, et beatorum spirituum efficiamini in cœlesti regno cohæredes. Amen.

Quod ipse.
Communio.

Acceptabis sacrificium justitiæ, oblationes, et holocausta, super altare tuum, Domine.

In tempore paschali: Alleluia.

Postcommunio.

Percipientes, Domine, munera salutis æternæ, te supplices exoramus, ut templum hoc vel cœmeterium a barbarorum vel iniquorum inquinamentis emundatum, tua benedictione maneat sanctificatum, et pectora nostra, ab omni sorde vitiorum alienata, tibi devota semper assistant. Per Dominum.

« PreviousContinue »