IUXTA LATINAM VULGATAM VERSIONEM AD CODICUM FIDEM IUSSU PII PP. XI CURA ET STUDIO MONACHORUM SANCTI BENEDICTI COMMISSIONIS PONTIFICIAE A PIO PP. X INSTITUTAE SODALIUM PRAESIDE AIDANO GASQUET S. R. E. CARDINALE EDITA LIBRUM GENESIS EX INTERPRETATIONE SANCTI HIERONYMI CUM PROLOGIS VARIISQUE CAPITULORUM SERIEBUS ADIECTIS PROLEGOMENIS RECENSUIT D. HENRICUS QUENTIN MONACHUS SOLESMENSIS ROMAE TYPIS POLYGLOTTIS VATICANIS MDCCCCXXVI PIO PP. XI PONTIFICI MAXIMO QUAM DIVINORUM LIBRORUM VULGATAM LATINAM EDITIONEM PATRES CONCILII TRIDENTINI AD FIDEM VETUSTISSIMORUM EXEMPLARIUM EMENDATISSIME FORE DECREVERE EAMQUE PONTIFICES ROMANI IN AEDIBUS S. CALISTI PERFICIENDAM CURARUNT S. BENEDICTI ALUMNI AD TANTUM OPUS VOCATI PRAESIDE EMO CARDINALI AIDANO GASQUET O. S. B. DEO OPTIMO MAXIMO GRATIAS REFERENTES DEVOTI GRATI SANCTITATI SUAE LIBRUM GENESEOS D. D. D. EPISTOLA SS. D. N. PII PP. XI AD R. D. HENRICUM QUENTIN, O. S. B. DE LIBRO GENESIS EX INTERPRETATIONE SANCTI HIERONYMI NOVIS CURIS AB EO RECENSITO ET NUPER EDITO. Feliciter sane Dilecte fili, salutem et apostolicam benedictionem. nuper contigit ut Monachorum Sancti Benedicti Commissio Pontificia, a Pio PP. X instituta, volumen primum ediderit quo liber Genesis continetur ex interpretatione Sancti Hieronymi, accurate quidem sapienterque a temet ipso recensitus. Nos perlibenter oblatum accepimus exemplar eiusdem voluminis, quod praeterquam singulari quodam typographicae artis nitore praestat, ob novae etiam criticae artis usum, et Tridentinae Synodi votis et decessorum Nostrorum Pii X ac Benedicti XV optatis plane satisfacit. Maxime ponderosum sane opus, quod quidem non tam ad textum, qui communiter adhibetur, emendandum pertinet, quam ad textum primigenum ex praestantissimis, qui extant, manu scriptis codicibus eruendum. Quamobrem nihil sane fecisti reliqui, dilecte fili, ut praecipuorum Europae codicum textus lucis ope studiose exprimeres, quos quidem postea, una cum sodalibus eruditissimis etiam atque etiam inter se comparandos curavisti: ac memorare hic placet Nos quoque, quantum potuimus, navasse vobis operam ut optatum exitum consequeremini. Quod autem ad rationem et viam attinet, qua ipse in conficiendo opere usus es, satis iam in epistula Non mediocri, haud ita pridem data, locuti sumus. Cum te igitur, dilecte fili, tum Commissionem istam universam, cui quidem dilectus filius Noster Aidanus Gasquet tam sollerter docteque praeest, merita laude honestamus: ac preces Deo fundentes ut vos adiutricis sapientiae suae lumine in praeclaro coepto urgendo prosequatur, in caelestium munerum auspicium itemque in peculiaris benevolentiae Nostrae signum, tibi, dilecte fili, cunctaeque Commissioni, imprimisque dilecto filio Nostro Cardinali Aidano Gasquet, apostolicam benedictionem effuso animo impertimus. Datum Romae apud Sanctum Petrum, die x mensis Novembris anno MDCCCCXXVI, Pontificatus Nostri quinto. PIUS PP. XI |